St. Thomas Sports Club Ammembal
ಯುವಜಣ್ ಜಾವ್ನಾಸಾತ್ ಸಮಾಜೆಚೆ ಬಳಾದಿಕ್ ಖಾಂಬೆ. ಯುವಸಕತ್ ಆಮ್ಚೆ ಥಂಯ್ ಆಸ್ಚೆಂ ಏಕ್ ದೆವಾಚೆಂ ದೆಣೆಂ ಜಾವ್ನಾಸಾ. ಸಗ್ಳ್ಯಾ ಸಂಸಾರಾರ್ ಅಗೋಸ್ತ್ 12ವೆರ್, ಅಂತರಾಷ್ಟ್ರೀಯ್ ಯಾವ ದೀಸ್ ಆಚರಣ್ ಕರ‍್ತಾತ್ ತರ್, ಆಮ್ಚ್ಯಾ ಭಾರತಾಂತ್ ಜನೆರ್
12ವೆರ್ ರಾಷ್ಟ್ರೀಯ್ ಯುವ ದೀಸ್ ಜಾವ್ನ್ ಆಚರಣ್ ಕರ‍್ತಾತ್. 1984 ಇಸ್ವೆಂತ್ ಭಾರತ್ ಸರ್ಕಾರಾನ್ ಸ್ವಾಮಿ ವಿವೇಕಾನಂದಾಚೊ ಜಲ್ಮಾ ದೀಸ್ (ಜನೆರ್ 12), ರಾಷ್ಟ್ರೀಯ್ ಯುವ ದೀಸ್ ಜಾವ್ನ್ ಆಚರಣ್ ಕರುಂಕ್ ನಿರ್ಧಾರ್ ಘೆತ್ಲೊ ಆನಿ 1985 ಇಸ್ವೆಥಾವ್ನ್ ಹೊ ದೀಸ್ ಆಚರಣ್ ಕರುಂಕ್ ಸುರು ಕೆಲೊ. ಭಾರತಾಚೊ ರಾಷ್ಟ್ರೀಯ್ ಯುವ ದೀಸ್ ಆಚರಣ್ ಕರ‍್ಚೊ ಉದ್ದೇಶ್ ಜಾವ್ನಾಸಾ ಯುವಜಣಾಂ ಥಂಯ್ ಸ್ವಾಮಿ ವಿವೇಕಾನಂದಾನ್ ಪ್ರತಿಪಾದನ್ ಕೆಲ್ಲಿಂ ತತ್ವಾಂ ತಾಂಚೆ ಥಂಯ್ ಗೂಂಡ್ ರೊಂಬಾಶೆಂ ಕರ‍್ಚೆಂ.
ಸ್ವಾಮಿ ವಿವೇಕಾನಂದ ಯುವಜಣಾಂಕ್ ಏಕ್ ಪ್ರೇರಣ್ ಜಾವ್ನಾಸಾ. ಯುವಜಣಾಂಕ್ ತಾಣೆಂ ದಿಲ್ಲೆ ಉಲೆ ಆಜೂನೀ ನಾಂವಾಡ್ದಿಕ್ ಸ್ಲೋಗನ್ ಜಾವ್ನ್ ಉರ‍್ಲ್ಯಾಂತ್. ದಾಖ್ಲ್ಯಾಕ್:
“ತುಮಿ ತುಮ್ಚೆರ್‌ಚ್ಚ್ ಪಾತ್ಯೆಣಿ ದವರಾ. ತವಳ್ ಮಾತ್ರ್ ದೆವಾಚೆರ್ ಪಾತ್ಯೆಣಿ ದವರುಂಕ್ ಸಾಧ್ಯ್ ಜಾತೆಲೆಂ”.
“ಊಟ್, ಜಾಗೊ ಜಾ, ತುಜೊ ಉದ್ದೇಶ್ ಜ್ಯಾರಿ ಜಾತಾ ಪರ್ಯಾಂತ್ ರಾವಾನಾಕಾ”.
“ಕಾಮ್, ಕಾಮ್, ಕಾಮ್ - ಹೊ ಜಾಂವ್ದಿ ತುಮ್ಚೊ ಧ್ಯೇಯ್”.
“ಜೀವನಾಂತ್ ರಿಸ್ಕ್ ಘೆ. ಜಿಕ್ಲ್ಯಾರ್ ತುಂ ಮುಖೆಲಿ ಜಾತಲೊಯ್. ಸಲ್ವಲ್ಯಾರ್, ಮಾರ್ಗದರ್ಶಕ್”.
ಅಸಲೊ ಉಲೊ ಸ್ವೀಕಾರ್ ರ‍್ನ್ ಅಮ್ಮೆಂಬಳ್ ಫಿರ್ಗಜೆಚ್ಯಾ ಅಭಿವೃದ್ಧೆ ಖಾತಿರ್ ನಿಸ್ವಾರ್ಥ್ಪಣಿ ಹಾತಾಕ್ ಹಾತ್ ದೀವ್ನ್ ಸಂಘಟಿತ್ ಥರಾನ್ ವಾವುರ‍್ಚ್ಯಾ ಬರ‍್ಯಾ ಉದ್ದೇಶಾನ್ ಅಮ್ಮೆಂಬಳ್ ಫಿರ್ಗಜೆಚ್ಯಾ ಸರ್ವ್ ಯುವಜಣಾಂಕ್ ಸಾಂಗಾತಾ ಘೆವ್ನ್ ದಸೆಂಬರ್ 11, 2022ವೆರ್ ಫಿರ್ಗಜೆಚೊ ಉಪಾಧ್ಯಕ್ಷ್ ಜಾವ್ನಾಸ್‌ಲ್ಲ್ಯಾ ಮಾನೆಸ್ತ್ ರೋಬರ್ಟ್ ಡಿಸೋಜಾ ಹಾಚ್ಯಾ ಮುಖೆಲ್ಪಣಾರ್ “St. Thomas Sports Club” ಸಂಘ್ ಸ್ಥಾಪನ್ ಕೆಲೊ.
ಸಾಂ. ಥೋಮಸ್ ಸ್ಪೋರ್ಟ್ಸ್ ಕ್ಲಬ್ ರಚ್‌ಲ್ಲೊ ಉದ್ದೇಶ್ ಫಕತ್ ಖೆಳ್-ಪಂದ್ಯಾಟ್ ಮಾಂಡುನ್ ಹಾಡ್ಚೆ ನ್ಹಯ್ ಆಸ್ತಾಂ ದುಬ್ಳ್ಯಾಂಕ್ ಕುಮೊಕ್ ಆನಿ ಫಿರ್ಗಜೆಚ್ಯಾ ಇತರ್ ಚಟುವಟಿಕಾಂನಿ ಮೆತೆರ್ ಜಾಂವ್ಚೆಂಯೀ ಜಾವ್ನಾಸಾ.
ಹ್ಯಾ ಸಂಘಾಚೊ ಪಯ್ಲೊ ಅಧ್ಯಕ್ಷ್ ಜಾವ್ನ್ ಶರತ್ ಗಲ್ಬಾಂವೊ, ಉಪಾಧ್ಯಕ್ಷ್ ಜಾವ್ನ್ ಕ್ಲೀಟಸ್ ಸಿಕ್ವೇರಾ ಆನಿ ಕಾರ್ಯದರ್ಶಿ ಜಾವ್ನ್ ಸ್ಟೀವನ್ ಪಿಂಟೊ ವಿಂಚುನ್ ಆಯ್ಲೆ.
ಪ್ರಸ್ತುತ್ ಅಧ್ಯಕ್ಷ್ ಜಾವ್ನ್ ಜೋನ್ಸನ್ ಡಿಸೋಜಾ, ಉಪಾಧ್ಯಕ್ಷ್ ಜಾವ್ನ್ ರಾಜೇಶ್ ಡಿಸೋಜಾ ಆನಿ ಕಾರ್ಯದರ್ಶಿ ಜಾವ್ನ್ ಜೈಸನ್ ಡಿಸೋಜಾ ವಾವರ‍್ತಾತ್. ಹ್ಯಾ ಸಂಘಾಂತ್ ಆತಾಂ 44 ಸಾಂದೆ ಆಸಾತ್.
ಹ್ಯಾ ಸಂಘಾ ಥಾವ್ನ್ ಎದೊಳ್‌ವರೇಗ್ ಕ್ರಿಸ್ಮಸ್ ಸೌಹಾರ್ದ ಟ್ರೋಫಿ, ಅಮ್ಮೆಂಬಳ್ ಫಿರ್ಗಜ್‌ಗಾರಾಂ ಖಾತಿರ್ ದೋನ್ ಪಾವ್ಟಿಂ Ammembal Premier League ಅಸಲೆ ಖೆಳಾ-ಪಂದ್ಯಾಟ್ ತಶೆಂಚ್ ಸಿಯೋನ್ ಆಶ್ರಮಾಚಿ ಭೆಟ್ ಆನಿ ಸಬಾರ್ ಗರ್ಜೆವಂತಾಂಕ್ ಆರ್ಥಿಕ್ ರಿತಿನ್ ಕುಮಕ್‌ ಕೆಲ್ಯಾ.
Follow us on Instagram!
Stay updated with our latest events, behind-the-scenes moments, and exciting news by following us on instagram. Click the link below to join our community!